Þingið marki Icesave pólitíska umgjörð

Svavar Gestsson, formaður samninganefndar um Icesave, segir óhjákvæmilegt að Alþingi hafi pólitíska skoðun á því hver verði framgangur samningsins. Hana mætti setja fram hvort sem er í nefndaráliti eða með öðrum hætti. Samninginn sjálfan verði hins vegar að samþykkja eða fella.

„Alþingi hlýtur auðvitað að hafa sína skoðun á því til dæmis hvernig framkvæmd samningsins verður háttað á komandi árum. Það er Alþingi sem ræður hinni pólitísku umgjörð málsins, eins og fjármálaráðherra sagði í viðtali í gær.“

Svavar segir að þróunin hafi sýnt að samningurinn sé um margt hagstæður. Margt í umhverfinu nú sé orðið óhagstæðara en var þegar hann var gerður. Í honum sé miðað við 4,30 prósenta SIRR-vexti og 125 punkta álag ofan á það; alls 5,55 prósenta vexti. SIRR-vextir séu í dag 4,70 prósent. Svavar segir að með því að hafna samningnum sé verið að taka mikla áhættu fyrir þjóðina og þjóðarbúið.

Svavar segir gríðarlega mikilvægt að náðst hafi það ákvæði í samninginn að hægt sé að segja honum upp og borga upp fáist fjármagn á hagstæðari kjörum. Þá sé lánstíminn lengri en gengur og gerist og mikilvægt sé fyrir þjóðina að fá efnahagslegt skjól í sjö ár.

Hann hafnar því að samningsstaða Íslendinga hafi verið vonlaus. Brautin hafi meðal annars verið lögð með undirskrift Davíðs Oddssonar 15. nóvember þar sem ábyrgð Íslendinga á skuldbindingunum sé viðurkennd. Þá hafi ramminn utan um viðræðurnar verið dreginn í samþykkt Alþingis frá 5. desember.

Svavar segir Brussel-viðmiðin hafa veitt viðspyrnu, en þar leggja Evrópska efnahagssvæðið og alþjóðasamfélagið áherslu á að tekið yrði tillit til þeirra erfiðu og fordæmalausu aðstæðna sem Ísland er í.

Samninganefndin hafi síðan miskunnarlaust beitt frystingu Breta og minnt á að Íslendingar hefðu skaðast af beitingu hryðjuverkalaganna. Þá hafi því verið beitt að þarna hafi komið í ljós að regluverk um innstæður í Evrópu væri gallað. Það að samþykkt hafi verið að eignir Landsbankans gengju upp í skuldir hafi líka hjálpað til. Samningsstaðan hafi því ekki verið vonlaus, en helgast af því að ákveðið hafi verið í nóvember að borga skuldirnar.

Ekki er reiknað með að þingnefndir ljúki umfjöllun um málið fyrr en eftir helgi.

kolbeinn@frettabladid.is