Banki leiðréttir bílalán í erlendri mynt

„Við höfum fundið fyrir mikilli þörf á lausnum vegna bílalána einstaklinga," segir Una Steinsdóttir, framkvæmdastjóri viðskiptabankasviðs Íslandsbanka.

Bankinn mun kynna leið fyrir viðskiptavini bankans sem felur í sér leiðréttingu á höfuðstóli bílalána í erlendri mynt auk breytinga á höfuðstóli verðtryggðra bílalána og bílasamninga í íslenskum krónum.

Íslandsbanki kynnti fyrir mánuði leiðréttingu á höfuðstóli fasteignalána, fyrstur fjármálafyrirtækja. Fljótlega í kjölfar þess var að sögn Unu farið að skoða möguleika á höfuðstólsleiðréttingu bílalána.

Leiðrétting Íslandsbanka felur í sér að erlend bílalán færast yfir í íslenskar krónur á breytilegum óverðtryggðum 10,5 prósenta vöxtum fyrsta árið. Þá stendur viðskiptavinum bankans til boða að lengja greiðslutíma lánsins að hámarki um 75 prósent af þeim fjölda greiðslna sem eftir er af láninu. Það getur þó aldrei orðið meira en þrjú ár.

Við breytinguna er miðað við myntkörfugengi fyrir um það bil ári en reiknað er með að höfuðstóll bílalána í erlendri mynt lækki um 23 prósent að meðaltali miðað við gengið 20. október síðastliðinn.

Höfuðstólsleiðrétting bankans verður í boði samhliða úrræðum stjórnvalda vegna skuldavanda heimilanna sem fór í gegnum Alþingi á föstudag og tekur gildi um mánaðamótin.

„Þetta er í raun annar valkostur en greiðslujöfnunarúrræði ríkisins og það má segja að leiðréttingin nýtist þeim best sem vilja selja bifreið og greiða upp lán, eða þeim sem vilja eyða gengisáhættu og færa skuld sína í íslenskar krónur," segir Una.

Landsbankinn og Kaupþing hafa ekki fjármagnað bílakaup viðskiptavina sinna með sama hætti og Íslandsbanki. Avant, Lýsing og SP-Fjármögnun vísa öll til greiðsluúrræða stjórnvalda um mánaðamótin á vefsíðum sínum auk annarra úrræða fyrir viðskiptavini. Á meðal þeirra er lenging lána, greiðsla kröfu eða skil á bílnum upp í skuld.jonab@frettabladid.is