Útistofan - skemmtileg skólastofa

Í starfi mínu sem kennari í Norðlingaskóla hef ég notið þeirra forréttinda að taka þátt í þróun útikennslu við skólann. Útikennsla hefur á síðustu árum fengið þó nokkra athygli og eru margir leik- og grunnskólar að tileinka sér vinnubrögð sem henta útikennslu. Vaxandi áhugi á útikennslu er ekki bundinn við Ísland. Við virðumst vera þó nokkrum árum á eftir nágrönnum okkar hvort sem litið er austur til Evrópu til Norðurlanda eða vestur um haf til Bandaríkjanna. Skólar á Íslandi nálgast útikennslu á margvíslegan máta og tekur sú nálgun jafnan mið af þeirri aðstöðu sem er til staðar í nágrenni skólanna. Þessi fjölbreytni í nálgun er líka mikilvæg og í raun fjársjóður í reynslubanka skólastarfs.

Rannsóknir vestan hafs gefa fyrirheit um að útikennsla sé til margra hluta nytsamleg og vekur það sértaka athygli mína að hún virðist hafa mjög góð áhrif á börn sem stríða við ofvirkni og athyglisbrest (ATHD). Skólar í Reykjavík notast við margar aðferðir til að hjálpa börnum sem eiga við ATHD að stríða en þessar rannsóknir sýna að vinna úti í náttúrunni er enn ein viðmót í þann aðferðabanka.

Í ljósi þessara upplýsinga er vert að staldra við og skoða hvernig hverfi Reykjavíkur eru skipulögð. Við staðsetjum leik- og grunnskóla gjarnan í miðju hverfa. Það gætu verið mistök og spurning hvort Reykjavík ætti ekki að staðsetja leik- og grunnskóla í útjaðri hverfa og greiða þannig börnum aðgengi að fallegri náttúru, sér til gangs og gleði. Skólalóðir þurfa ekki að vera flóknar eitt tré eða lítil lundur getur verið uppspretta margvíslegra rannsókna og ævintýra fyrir börnin í borginni.

Þeir sem hafa áhuga á að kynna sér útkennslu Norðlingaskóla eru hvattir til að heimsækja heimasíðu skólans www.nordlingaskoli.is og ýta á hlekkinn Björnslundur.

Höfundur er varaborgarfulltrúi Vinstri grænna í Reykjavík.