Fullyrðingar Magnúsar fjarstæðukenndar

Fjármálaeftirlitið hefur nú til skoðunar hvort sýndarviðskipti hafi átt sér stað þegar Straumur Burðarás lánaði Magnúsi Þorsteinssyni tæplega einn milljarð króna til kaupa á hlut í Icelandic Group. Grunur leikur á að bankinn hafi komið sér undan yfirtökuskyldu á félaginu. Bankinn segir fullyrðingar Magnúsar ósannar og beinlínis fjarstæðukenndar.

Aðalmeðferð í skuldamáli þrotabús Straums Burðaráss gegn Magnúsi Þorsteinssyni, fyrrum viðskiptafélaga Björgólfsfeðga, fór fram í Héraðsdómi Norðurlands í síðustu viku. Bankinn lánaði Magnúsi ríflega einn milljarð króna árið 2007 til að kaupa fjárfestingarfélagið BOM sem átti 3,8% hlut í Icelandic Group.

Magnús var úrskurðaður gjaldþrota í maímánuði en bankinn krefst þess að Magnús greiði lánið til baka.

Fyrir dómi sagði Magnús að hann hafi skrifað undir sjálfskuldarábyrgð vegna lánsins af greiðasemi við eiganda Straums Burðaráss, sem þá var Björgólfur Thor Björgólfsson. Með ábyrgðinni hafi bankinn komist undan yfirtökuskyldu á Icelandic Group. Sé fullyrðing Magnúsar rétt er ljóst að um sýndarviðskipti var að ræða.

Samkvæmt hlutahafalista áttu félög sem voru að hluta í eigu Björgólfs Thors rúmlega 39 prósenta hlut í Icelandic Group í lok árs 2007.

Hefði Magnús ekki keypt B-O-M hefði eignarhluti fyrirtækja í eigu Björgólfs farið yfir 40% og þar með myndast yfirtökuskylda samkvæmt lögum sem þá voru í gildi. Yfirtakan hefði kostað Björgólf umtalsverða fjármuni en í árslok 2007 voru fjármálamarkaðir almennt að lokast.

Fjármálaeftirlitið ætlar að skoða málið.

Magnúsi ber að gangast við skuldbindingum sínum

Fréttastofa sóttist eftir viðtali við forsvarsmenn Straums Burðaráss í dag en þeir báðust undan því. Eftir að fréttatími Stöðvar 2 hófst barst tilkynning frá bankanum. Þar segir að þrátt fyrir ítrekaðar kröfur Sraums hafi Magnús ekki efnt

persónulega ábyrgð sína gagnvart bankanum.

„Hann hefur fyrir dómi borið að ábyrgðin hafi meðal annars verið veitt af greiðasemi við Straum sem þannig hafi komið sér hjá þeirri skyldu að yfirtaka kauphallarskráð félag. Magnús hafi verið fullvissaður um að aldrei kæmi til þess að á ábyrgðina myndi reyna," segir í tilkynningunni.

Ennfremur segir í tilkynningu Straums að fullyrðingar Magnúsar séu ósannar og beinlínis fjarstæðukenndar. „Þær eru Magnúsi haldlausar til varnar í málaferlunum við Straum. Kjarni málsins er sá að vitaskuld ber Magnúsi eins og öðrum að gangast við skuldbindingum sínum, þar á meðal persónulegum ábyrgðum sem hann hefur tekist á herðar."