Sóknarleikur í ferðaþjónustu

Það er ánægjulegt að sjá þann kraft sem einkennir ferðaþjónustuna um þessar mundir. Hvarvetna er sótt fram af bjartsýni og dug. Nú á dögunum kynntu tvö helstu flugfélögin aukinn sóknarleik á næsta ári. Iceland Express hyggst bæta við Ameríkuflugi og fjölgun áfangastaða í Evrópu, og Icelandair mun auka sætaframboð sitt um 10%. Þessi fjölgun ferða hefur í för með sér fjölgun starf hjá flugfélögunum og hjá ferðaþjónustuaðilum hér á landi. Líklega má reikna með tæplega 500 störfum vegna þessarar aukningar.

Sú jákvæða þróun hefur einnig átt sér stað að hver og einn ferðamaður er að skila meiri tekjum í þjóðarbúið. Þannig er arðsemin í geiranum að styrkjast mikið. Er nú svo komið að ferðaþjónustan er önnur mikilvægasta atvinnugreinin hér á landi, en um 17% af erlendum þjóðartekjum koma í gegnum erlenda ferðamenn.

Stjórnmálamenn verða að horfa í eigin barm og íhuga með hvaða hætti er best að styrkja þessa þróun. Þingflokkur Samfylkingar hefur lagt á það þunga áherslu að það fjármagn sem lífeyrissjóðirnir ætla til stuðnings íslensku atvinnulífi í vetur verði að einhverju leyti beint til ferðaþjónustunnar. Margvíslegar leiðir er hægt að hugsa sé þar, s.s. við uppbyggingu á lykilferðamannastöðum og innan þjóðgarða.

Um leið á ríkisvaldið að styrkja þá þætti ferðaþjónustunnar sem auka arðsemi hennar. Tónlistar- og ráðstefnuhúsið er til að mynda mikilvægt skref til að styrkja ráðstefnumarkaðinn á Íslandi og miklir eru möguleikar okkar á sviði heilsuferðaþjónustu. Annars vegar hvað snertir framboð á lækningaþjónustu fyrir erlenda gesti og mikilvægt að ferðaþjónustunnar eigi þar gott samstarf við yfirvöld heilbrigðismála. Hins vegar eru sóknarfæri fyrir þá sem eru almenn heilbrigðir þ.e. í afslöppunar- og vellíðunarferðaþjónustu (wellness), og sækja í heilsulindir eða almennar laugar. Þar gegnir íslenska vatnið lykilhlutverki, en mikið aðgengi að gufu, heitu, köldu og heilnæmu vatni getur verið það sértæka sem gerir Íslandi kleift að vera í fremstu röð á sviði heilsuferðaþjónustu. Það liggja víða sóknarfæri fyrir íslenska ferðaþjónustu og þau ber að nýta nú um stundir.

Höfundur er alþingismaður.