Vonast eftir lausn á Icesave fyrir mánaðamót

Jóhanna Sigurðardóttir forsætisráðherra segist vonast til þess að lausn fáist í Icesave málinu áður en þing kemur saman fyrsta október næstkomandi.

„Ég er að vona að við séum að fá lausn í þessu máli á næstu dögum og vonandi áður en þing kemur saman," sagði Jóhanna fyrir sameiginlegan þingflokksfund Samfylkingarinnar og VG sem hófst klukkan fjögur í dag. Þá segist Jóhanna einnig eiga von á því að fá fljótlega svör við bréfum sem hún sendi forsætisráðherrum Breta og Hollendinga vegna málsins.

Bretar og Hollendingar sendu ríkisstjórn Íslands skilaboð í síðustu viku þar sem fram kom álit þeirra á fyrirvörum sem Alþingi Íslendinga samþykkti við ríkisábyrgð á Icesave samkomulaginu í síðasta mánuði. Helstu athugasemdir Breta og Hollendinga eru þær að í fyrirvörunum er gert ráð fyrir að ríkisábyrgð renni út árið 2024.