Meirihlutinn vill skutlið áfram

Fyrir ári fluttu fulltrúar Samfylkingar og VG í Umhverfis- og samgönguráði tillögu um að hefja þegar vinnu við mótun grænnar samgöngustefnu í hverfum borgarinnar í samvinnu við hverfisráð, frístundaaðila, íbúasamtök og aðra sem málið varðar. Markmiðið var að börn og fullorðnir gætu á öruggan og auðveldan hátt komist á milli staða í hverfinu án þess að nota bíl og áhersla var lögð á að eyða þörfinni fyrir skutl.

Tillagan var söltuð af meirihlutanum, sem þó bókaði um hana fögur orð. Hverfisráð Grafarvogs tók svo tillöguna upp í vor og samþykkti einróma að láta vinna samgöngustefnu fyrir Grafarvog. Var undirrituðum falin umsjón verkefnisins. Nú hafa allir grunn- og leikskólar hverfisins og stórir aðilar í frístundastarfi tekið þátt í því starfi. Stefnunni hefur verið vel tekið af foreldrum og nemendum, sem nýverið settu Íslandsmet í hjólalest. Næsta skref er að minnka þörfina fyrir skutl með því að samræma hringleiðir strætó og frístundastarf í hverfinu.

Reynslan af verkefninu er framar vonum en undirstrikar þörfina á að kjörnir fulltrúar láti sig málið varða, tengi saman aðila í hverfinu og fylgi verkefninu eftir í stjórnsýslunni. Í þessu ljósi var tillaga Samfylkingar og VG endurflutt á síðasta fundi Umhverfis- og samgönguráðs. Viðbrögð meirihlutans komu á óvart – tillögunni var vísað frá með þeim rökum að ekki væri æskilegt að borgin hefði frumkvæði að slíkri stefnu. Það gæti dregið úr frumkvæði íbúanna sjálfra.

Þetta er undarleg afstaða hjá kjörnum fulltrúum meirihlutans. Þegar fundist hefur markviss leið til að draga úr skutli, efla öryggi og heilbrigði barna og góðan hverfisbrag vilja þeir ekki hafa frumkvæði að henni. Vilja ekki miðla bestu aðferðum á milli hverfa, ryðja úr vegi hindrunum og flýta fyrir því að öll hverfi borgarinnar fái græna samgöngustefnu sem sérstaklega er sniðin að þeirra þörfum. Meirihlutinn vill bíða eftir frumkvæði íbúa sjálfra. Það er gott umhugsunarefni fyrir foreldra í löngum og tíðum skutlferðum í vetur. Hugsanlega mun frumkvæði íbúa í vor koma meirihlutanum á óvart.

Höfundur er varaborgarfulltrúi og talsmaður borgarstjórnarflokks Samfylkingar í umhverfis- og samgöngumálum.