Flóðavarnir stóðust ekki gríðarlegt álag

„Bílarnir flutu niður götuna. Það verður langt þangað til Cockermouth jafnar sig eftir þetta,“ sagði Michael Dunn, knæpueigandi í bænum Cockermouth á Englandi. „Þetta hefur lagt bæinn í rúst.“

Bærinn Cockermouth varð verst úti í flóðunum í Kúmbríuhéraði á norðanverðu Englandi, skammt frá landamærum Skotlands. Bjarga þurfti meira en 200 manns úr húsum í bænum, en alls flæddi umhverfis nærri þúsund heimili á flóðasvæðinu. Einn lögreglumaður fórst.

Breskir hermenn fóru hús úr húsi að kanna hvort einhver væri innikróaður vegna flóðanna, sem sums staðar voru allt að 2,5 metra djúp.

Daginn áður hafði rignt meira en dæmi eru til í þessum landshluta. Á einum stað mældist úrkoman 314,4 millimetrar á einum sólarhring.

Hilary Benn umhverfisráðherra sagði að flóðavarnir á þessum slóðum ættu að standast flóð eins og þau gerast mest á hverri öld, en úrhellið að þessu sinni varð meira en nokkur gat reiknað með.

„Það sem við þurftum að takast á við síðustu nótt var frekar nokkuð sem búast má við á þúsund ára fresti, þannig að jafnvel allra bestu varnir geta brugðist þegar þetta mikil úrkoma kemur á þetta stuttum tíma,“ sagði hún.

Töluverð flóð urðu einnig á stórum hluta Írlands eftir óvenjumiklar rigningar og hvassviðri. Meira en eins metra hátt vatn lá yfir miðbænum í Cork, næststærstu borg landsins. Álíka mikil flóð urðu í meira en tíu bæjum og borgum Írlands.

Í gær hætti loks að rigna og flóðin tóku að réna, sem gaf björgunarfólki færi á að komast á bátum að fólki sem var innikróað í húsum sínum.

Tony Walker, einn íbúa í Cockermouth, sagði í útvarpsviðtali í gærmorgun, þegar hann var enn innikróaður, að flóðið á neðstu hæðinni heima hjá sér næði í brjósthæð. Hann hefði þurft að bíða björgunar á efstu hæðinni.

„Ég hef lifað betri morgna,“ sagði hann. „Ég hef beðið hér í alla nótt og er orðinn drykkjarvatnslaus, þannig að ég er í alvöru að hugsa um að koma mér burt. Vatnið er enn býsna djúpt. Það fer lækkandi, en það gerist svo hægt að það verða klukkutímar þangað til það verður orðið autt.“

gudsteinn@frettabladid.is