Maður lést í flugslysi

Einn maður lést í flugslysi þegar Cessna-flugvél hrapaði skammt frá Vopnafirði í dag. Annar maður sem var um borð í flugvélinni var fluttur lífshættulega slasaður með sjúkraflugi til Reykjavíkur.

Flugvélin lagði af stað frá Vopnafirði til Mosfellsbæjar um klukkan fjögur í dag og var förinni, samkvæmt heimildum Vísis, heitið til Mosfellsbæjar, þar sem lenda átti um klukkan sex.

Um 12 mínútum síðar var tilkynnt að flugvélin hefði brotlent skammt frá Vopnafjarðarflugvelli. Nú er komið í ljós að tveir menn voru um borð í flugvélinni og að annar þeirra er látinn.

Hinn var fluttur með sjúkraflugi til Reykjavíkur og er lífshættulega slasaður. Flugvélin er talin hafa flogið á raflínur við veiðihúsið Hvammsgerði við Selá samkvæmt heimildum Vísis.

Sjúkraflugvél kom frá Akureyri og sótti þann sem lifði af en flogið var með hann til Reykjavíkur.

Flugvélin fór frá Vopnafirði um klukkan fjögur síðdegis í dag (fimmtudag) en um tólf mínútum síðar barst Flugstjórn tilkynning frá neyðarlínunni um að slys hefði átt sér stað. Björgunasveitarmenn fóru þegar á vettvang og Rannsóknarnefnd flugslysa var látin vita sem sendi rannsóknarteymi sitt á staðinn.