ESB vill draga umtalsvert úr fiskveiðum

Framkvæmdastjórn Evrópusambandsins telur að draga þurfi umtalsvert úr fiskveiðum á hafsvæði ESB. Þannig verði tryggt að fiskveiðar verði sjálfbærar. Fækka þurfi skipum og bátum, draga úr fjárstuðningi til greinarinnar og herða refsingar fyrir brot.

Grænbók framkvæmdastjórnarinnar um sameiginlega fiskveiðistefnu Evrópusambandsins verður birt á morgun. Breska ríkisútvarpið, BBC, hefur komist yfir eintak af henni og fjallar um hana á vefsíðu sinni. Samkvæmt BBC kemur fram í grænbókinni að þrjátíu prósent fiskistofna í lögsögu ESB séu í hættu. Þrátt fyrir umtalsverðar breytingar á fiskveiðistefnunni 2002 sé enn stunduð ofveiði, fiskveiðiflotar aðildarríkjanna enn of stórir, niðurgreiðsla enn of miklar og enn of mikið veitt af undirmálsfiski.

Áttatíu prósent af öllum fiskistofnum séu undir hámarks framleiðnigetu - það er mestu veiði sem hægt er að viðhalda í óákveðinn tíma. Niðurstaða framkvæmdastjórnarinnar er að hvað suma stofna varði, þar á meðal Norðursjávar þorsk, sé meirihluti fisks veiddur áður en hann kemst á hrygningaraldur.

Það er mat framkvæmdastjórnar ESB að drag þurfi umtalsvert úr fiskveiðum í Atlantshafi og Norðursjó um tíma eða þar til tryggt er að stofnarnir hafa náð sér og að veiðarnar verði sjálfbærar.

Það er mat framkvæmdastjórnarinnar að til lengri tíma litið muni sjómenn og sjávarútvegsfyrirtæki hagnast á þessu en eins og kerfið sé uppbyggt nú sé frekar horft til skammtímagróða. Mörg ríki hafi viðhaldið mikilli veiði á veikum stofnun af pólitískum ástæðum.

Framkvæmdastjórnin leggur því til að ábyrgð á fiskveiðistjórninni verði ekki síður hjá sjómönnunum sjálfum en hjá stofnunum í Brussel og stjórnvöldum aðildarríkja og unnið verði náið með sjómönnum um leið og þeir verði hvattir til að taka mið af langtíma hagsmunum.

Lagt er til að allar niðurgreiðslur til fiskveiða verði aflagðar, eftirlit verði aukið og refsingar vegna brota hertar. Einnig er lagt til að skýr greinarmunur verði gerður annars vegar á réttindum veiðiskipa í litlum samfélögum þar sem strandveiðar eru lifibrauðið og hins vegar á verksmiðjuskipum stórra sjávarútvegsfyrirtækja.