Eignir bankans rýrna og skuldabyrði eykst

Samkvæmt nýju mati skilanefndar Landsbanka Íslands hf. er gert ráð fyrir því að 83 prósent fáist upp í forgangskröfur miðað við stöðuna 30. apríl síðastliðinn. Matið hefur lækkað úr 89 prósentum í febrúar. Ef matið reynist rétt munu nettóskuldir íslenska ríkisins vegna Icesave-samningsins hækka úr 72 milljörðum í 115 milljarða.

Þar að auki munu vaxtagreiðslur af Icesave-samningnum bætast við þessa fjárhæð.

Lárus Finnbogason, formaður skilanefndar Landsbankans, segir að sá hluti sem eftir varð í gamla Landsbankanum hafi verið langsamlega verstu lánin í lánasafni bankans. Það skýri að hluta ástæður þess að endurheimtuhlutfall lána íslenska lánasafnsins sé einvörðungu 23 prósent, það langlægsta af þeim lánasöfnum sem bankinn á hlut að.

Endurheimtuhlutfall áhættusömustu útlána Landsbankans í London séu 63 prósent og 97 prósent í svokölluðum eignatryggðum flokki. Því eru lán Landsbankans erlendis að skila sér mun betur en útlán hérlendis.

Lárus segir að í sumum tilfellum sé einungis verið að fá smáræði upp í milljarðakröfur íslenskra eignarhalds- og fjárfestingarfélaga. Hann segir að þessi félög dragi endurheimtuhlutfallið umtalsvert niður. Hann segir jafnframt að óvissan um eignasafnið sé enn ákaflega mikil og erfitt sé að meta það. Lárus bætir við að birt verði uppfært mat á verðmæti eigna í ágúst.

„Ég verð stöðugt áhyggjufyllri yfir því að það eigi að samþykkja þennan Icesave-samning," segir Tryggvi Þór Herbertsson, þingmaður Sjálfstæðisflokksins.Hann segir samninginn ótraustari en hann gerði ráð fyrir og hann vilji sjá ákveðið hámark á þær skuldbindingar sem íslenska ríkið taki á sig. Hann er ekki ánægður með þá óvissu og miklu áhættu sem er viðloðandi samninginn og segir erfitt að skrifa undir við þessar aðstæður.

„Ég tel þó að tjónið af völdum Icesave-samninganna verði af þeirri stærðargráðu að það sé viðráðanlegt," segir Helgi Hjörvar alþingismaður, sem jafnframt er formaður efnahags- og skattanefndar. Helgi segist ánægður með að matið frá því í febrúar gangi í aðalatriðum eftir en það sé vissuleg slæmt að eignirnar séu að rýrna.

bta@frettabladid.is