Erlend skuldastaða er vel öfugu megin við 200%

Eins og fram kom í fréttum Stöðvar 2 í fyrradag voru útreiknaðar erlendar skuldir þjóðarbúsins 253% af landsframleiðslu. Steingrímur J. Sigfússon, fjármálaráðherra, segir að það sé alveg ljóst að erlend skuldastaða þjóðarbúsins sé mjög tæp og sé vel öfugu megin við 200% af landsframleiðslu. Alþjóðagjaldeyrissjóðurinn sagði í nóvember að ef hlutfallið færi í 240% þá gæti landið ekki staðið undir slíkum skuldum.

Steingrímur segir að ríkissjóður eigi að geta staðið við sínar skuldbindingar þó að hlutfall lána ríkissjóðs af landsframleiðslu fari í 125%. Þetta kom fram á Morgunvakt Rásar 2 í morgun.

Aðspurður um hver raunveruleg skuldastaða þjóðarbúsins sé, segir Steingrímur:

„Það kemur í ljós þegar úrvinnsla mála í bönkunum liggur fyrir. Það eru miklar eignir sem enn eru bókfærðar í bönkunum og líklega þarf að afskrifa hluta af þeim eignum.

Þá stöndum við eftir með hinar raunverulegu hreinu skuldir rekstrarfélaganna sem enn eru til og þá á skuldastaðan að koma betur í ljós," segir Steingrímur.

„Fyrr í vetur vanmátu menn eða gleymdu skuldum sveitarfélaga, orkufélaga og slíku.

Nú er þetta orðið betur kortlagt af hálfu Alþjóðagjaldeyrissjóðsins. Sjálfur var ég ekki í nokkrum vafa um það að þá var um að ræða vanmat á skuldum ríkisins og þjóðarbúsins," segir Steingrímur.

Hvað gerist ef við höfnum Icesave?

„Ef við höfnum Icesave og leysum ekki úr okkar deilumálum óttast ég að við þurfum að draga upp hvíta fánann og fara til Parísar. Ég vil að við berjumst til þrautar og reynum að standa við skuldbindingar okkar. Ef við sjáum það eftir nokkur ár að við ráðum ekki við skuldbindingarnar þá eigum við þann kost að semja aftur við okkar viðsemjendur, um aðstoð og greiðsluaðlögun," segir fjármálaráðherra.

Steingrímur segir að ríkisfjármálin séu að komast á réttan kjöl og það styttist í að afgreiðslu bankanna ljúki. Hann væntir þess einnig að fjárlög ríkisins muni skila afgangi árið 2013.

„Það gæti komið sú staða að við þyrftum að lengja lánin og fá niðurfellingu vaxta. Allt núverandi "prógram" strandar ef við fellum Icesave samninginn, málin komast í óvissu og upplausn. Eins og ég sagði í gær, þá kemur Október aftur. Í hreinskilni sagt þá held ég að næsta ár verði mjög erfitt og um mitt næsta ár ættum við að vera komin í gegnum versta hjallann. Þrátt fyrir það verða næstu ár ansi erfið og næstu þrjú til fimm ár verða ákveðinn uppbyggingartími í efnahagslífi þjóðarinnar," sagði Steingrímur J. Sigfússon, fjármálaráðherra.