Hindruðu sölu samheitalyfja

Lyfjakaupendur í Evrópu þurftu að greiða um þremur milljörðum evra, andvirði yfir 500 milljarða króna, meira fyrir lyf á árabilinu 2000-2007 vegna þess að lyfjafyrirtæki stóðu vísvitandi í vegi fyrir sölu ódýrari samheitalyfja. Að þessari niðurstöðu hafa samkeppnisyfirvöld ESB komist.

Niðurstöður rannsóknar sem samkeppniseftirlit ESB gerði hjá lyfjarisum - þar á meðal Pfizer, GlaxoSmithKline og Sanofi-Aventis – sýna að fyrirtækin hindruðu eða töfðu fyrir markaðssetningu samheitalyfja til að þau töpuðu ekki tekjum af arðbærari lyfjum, að því er greint var frá á blaðamannafundi í Brussel.

Lyfjafyrirtækin beittu dýrum lagaklækjum og öðrum brögðum til að tefja fyrir því að samheitalyfjafyrirtæki gætu tekið til við að framleiða samheitalyf þegar einkaleyfi voru útrunnin.

Neelie Kroes, sem fer með samkeppnismál í framkvæmdastjórn ESB, sagðist vonast til að lyfjafyrirtækin breyttu um hætti. „Þetta skiptir miklu því að meiri nýbreytni og hagkvæmari lyf þýðir betra líf og sparnað fyrir sjúklinga – og opinbera sjóði.“