Sakfelldir fyrir að skipuleggja flugvélahryðjuverk

Þrír menn voru í Bretlandi í dag sakfelldir fyrir að leggja á ráðin um meiri háttar hryðjuverk. Þeir voru ásamt fimm öðrum ákærðir fyrir að hafa ætlað að sprengja sprengjur um borð í flugvélum á leið yfir Atlantshafið, en upp komst um áformin árið 2006.

Samkvæmt fregnum breskra miðla hugðust mennirnir fela sprengiefni í vökvaformi í gosflöskum og komast þannig með það um borð í flugvélar á Heathrow. Breska leyniþjónustan komst hins vegar á snoðir um áformin og handtók mennina. Þetta varð hins vegar til þess að reglur flugfélaga um meðferð vökva voru hertar mjög.

Einn áttmenninganna var sýknaður í málinu og þá komst kviðdómur ekki að niðurstöðu í máli fjögurra mannanna. Saksóknarar bentu á að sjö mannnanna hefðu gert sjálfsmorðsmyndbönd áður en þeir voru handteknir en mennirnir héldu því fram að ætlunin hefði verið að valda ótta meðal almennings en ekki drepa neinn.