Ingimundur: Sáttur við mína frammistöðu

Frammistaða Ingimundar Ingimundarsonar í Peking var frábær en það kom mörgum á óvart hversu vel hann spilaði í vörninni.

„Ég er rosalega stoltur en samt svolítið vonsvikinn. Þetta er samt sem áður frábært og ég er smám saman að átta mig á því sem gerðist hérna," sagði Ingimundur og bætir við að hann sé mjög stoltur af því að vera hluti af liðinu.

„Þetta er bara alveg frábært og ótrúlegur hópur. Allt í kringum liðið er frábært, ótrúlega góður og samstilltur mannskapur," sagði Ingimundur en hann átti ekkert endilega von á því að vera á leiðinni til Peking fyrir nokkrum vikum síðan.

„Ég var svona á gráa svæðinu. Ég kem kannski inn fyrir Vignir sem var meiddur og það eru nú engine venjuleg fótspor að fylla í en ég held það hafi tekist ágætlega. Ég spilaði kannski stærra hlutverk hér en margir bjuggust við. Ég er tiltölulega sáttur við mina frammistöðu og enn þá sáttari við frammistöðu liðsins," sagði Ingimundur sem hefur verið inn og út úr landsliðshópnum undanfarin ár en er væntanlega búinn að næla sér í fast sæti eftir frammistöðuna í Peking.

„Ég stefni eðlilega á að halda mér í hópnum og tel mig eiga það skilið. Það hefur oft verið sagt að það sér erfiðara að komast út úr hópnum en inn í hann. Ég hef reyndar afsannað þá kenningu mörgum sinnum," sagði Ingimundur og hló dátt. „Svo á Gummi eftir að uppgötva mig sem sóknarmann líka. Ég á mikið inni."