Björgólfur Thor sá 29. ríkasti í Bretlandi

Björgólfur Thor Björgólfsson er í 29. sæti á lista yfir ríkustu menn Bretlands sem Sunday Times birtir í dag. Eignir Björgólfs Thors eru metnar á 2,07 milljarða punda eða um 300 milljarða íslenskra króna miðað við lokagengi pundsins á föstudag.

Björgólfur Thor fellur eilítið á listanum frá því í fyrra en þá var hann í 23. sæti. Eignir hans þá voru metnar örlítið minni heldur en í ár eða um 2,04 milljarðar punda.

Björgólfur Thor hefur ekki farið varhluta af hlutabréfalækkun á íslenskum markaði og þannig hafa bréf hans og föður hans Björgólfs Guðmundssonar í Landsbankanum og Straumi-Burðarás rýrnað verulega. Á móti kemur að Björgólfur Thor seldi hlut sinn í búlgarska fjarskiptafyrirtækinu BTC á síðasta ári og hagnaðist um 60 milljarða á þeirri sölu. Björgólfur Thor var á dögunum í 307. sæti yfir ríkustu menn heims í úttekt Forbes-tímaritsins.

Líkt og undanfarin ár eru aðeins þrír Íslendingar á listanum yfir 1000 ríkustu einstaklinga Bretlands. Bræðurnir Lýður og Ágúst Guðmundssynir eru saman í 213. sæti á listanum með eignir upp á 410 milljónir punda eða um 59 milljarða íslenskra króna.

Í fyrra voru þeir í 53. sæti og voru eignir þeirra þá metnar á nær þrefalt hærri upphæð eða um 1,2 milljarða punda. Eina ástæðan fyrir miklu falli Bakkabræðra er að sjálfsögðu gengi Exista þar sem þeir bræður eiga um 45% hlut. Gengi þess félagsins hefur fallið um 60% á því ári sem liðið hefur frá síðasta lista Sunday Times. Fyrir tveimur árum voru þeir bræður í 103. sæti með eignir upp á 532 milljónir punda.

Sunday Times birtir ekki listann yfir 2000 ríkustu einstaklinga Bretlands á vef sínum fyrr en á þriðjudag en hér má sjá þá 150 ríkustu.