Ferrari í sterkri stöðu fyrir tímabilið

Brasilíumaðurinn Felipe Massa telur að Ferrari liðið sé í þægilegri stöðu hvað undirbúning fyrir tímabilið varðar. Á mánudag mætir Michael Schumacher til leiks hjá Ferrari á Barcelona brautinni og æfir með Kimi Raikkönen. Schumacher er mjög snjall í þróunarvinnu, en hann hefur ekki ekið 2008 bíl Ferrari til þessa. ,,Við erum á réttum stað í undirbúningsferlinu, en þurfum að fínstilla ýmsa þætti í bílnum. Ég hef samt trú á því að við stöndum vel að vígi”, sagði Massa. Ferrari var ekki með bestu tímanna á æfingum í Barcelona í síðustu viku, en Massa hefur ekki áhyggjur af því. ,,Tímarnir á æfingum er ekki það sem skiptir mestu máli. Við eigum eftir að bæta bílinn, en það gætu orðið óvænt úrslit í fyrsta mótinu”, sagði Massa. Ferrari mun æfa frá mánudegi ti miðvikudags og ef það rignir á mánudag eins og spáð er gætu æfingar staðið fram á fimmtudag. Þess má geta að starfsmenn Sýnar verða í Barcelona í vikunni og vinna að sérstökum þætti um lokaæfingu keppnisliðanna í Barcelona. Öll keppnislið verða á brautinni, en óljóst er hvort Super Aguri liðið æfir eður ei. Framkvæmdarstjóri liðsins, Auguri Suzuki er að reyna fjárfesta í Japan til að efla rekstur liðsins. sjá nánar á www.kappakstur.is