Franski bankinn kærir verðbréfaskúrkinn

Franski bankinn Societe Generale hefur höfðað mál á hendur Jerome Kerviel, miðlaranum sem sagt var upp störfum hjá bankanum fyrir óheimila spákaupmennsku sem olli því að jafnvirði 480 milljarða íslenskra króna gufuðu upp úr bókum bankans.

Viðskipti voru stöðvuð til skamms tíma með hlutabréf í bankanum í gær eftir að tilkynnt var um málið en bankastjórnin uppgötvaði það um helgina. Hún hefur ekki sagt hvaða maður eigi hlut að máli en fjölmiðlar flögguðu því í gær að hann héti Jerome Kerviel, væri 31 árs og fyrrum aðstoðarframkvæmdastjóri yfir verðbréfa- og afleiðuviðskiptum bankans.

Spákaupmennska Kerviels er eins sú umsvifamesta í sögunni. Til samanburðar er verðbréfaskúrkurinn Nick Leeson, sem með spákaupmennsku sinni með japanska jenið olli gjaldþroti Baringsbanka fyrir þrettán árum, smápeð í samanburði. Hann tapaði rétt um 92 milljörðum íslenskra króna að núvirði.

Daniel Bouton, forstjóri Societe Generale, bað hluthafa afsökunar á því að innra eftirlit bankans hafi ekki orðið gjörningsins vart í tæka tíð og baðst lausnar frá starfi. Bankastjórnin tók það hins vegar ekki í mál en fjármálasérfræðingar segja framtíð hans óljósa, að sögn breska ríkisútvarpsins.

Þeir segja sömuleiðis að þótt bankinn hafi gripið til aðgerða til að bæta eiginfjárstöðuna í skugga tapsins þá sé hann mjög viðkvæmur um þessar mundir og geti orðið yfirtöku að bráð.

Gengi hlutabréfa í Societe Generale féll um 4,1 prósent eftir að viðskipti hófust með þau í kauphöllinni í París í gær. Það hefur gengið til baka að nokkru leyti í dag en gengið hækkaði um 2,7 prósent í fyrstu viðskiptum dagsins.