Þakklát fyrir að Fischer fékk að deyja á Íslandi

Guðfríður Lilja Grétarsdóttir, formaður Skáksambands Íslands, segist þakklát fyrir það að Íslendingar hafi komið Bobby Fischer til hjálpar og hann hafi fengið að deyja frjáls á Íslandi en ekki í fangelsi. Bobby Fischer lést í gær.

„Hann var almesti skáksnillingur sögunnar og bar höfuð og herðar yfir alla aðra skákmenn," segir Guðfríður Lilja. Hún segir að bilið á milli hans og næstu manna hafi verið alveg ótrúlegt. „Fólk stóð alveg á öndinni yfir því hvernig hann tefldi," segir Guðfríður. Hún segir að fólk geri sér ekki grein fyrir því í dag hversu stórkostlegur atburður skákeinvígi Fischers og Spasskýs var.

„Uppgjörið á milli Spasskýs og Fischers kristallaði í raun kalda stríðið," segir Guðfríður.