Fjármálaeftirlitin vildu Icesave í dóttufélag

Bæði breska og íslenska fjármálaeftirlitið vildu að Icesave-reikningar Landsbankans í Bretlandi yrðu færðir í sérstakt dótturfélag í stað þess að það væri útibú bankans hér á landi. Þetta kom fram í máli Halldórs J. Kristjánssonar, fyrrverandi bankastjóra Landsbankans, í Markaðnum á Stöð 2 í morgun.

Halldór fór yfir málefni Icesave sem er mikið bitbein milli Íslendinga og Breta þessa dagana. Óttast menn að mörg hundruð milljarðar króna lendi á íslenska ríkinu vegna þeirra.

Halldór er sagður hugmyndafræðingurinn á bak við þá reikninga. Hann sagði að Landsbankinn hefði hafið töku innlána í Bretlandi árið 2003. Þá hefði hann verið með jafnræði milli innlána og útlána í banka sínum, Heritable.

Árið 2006 hafi íslenska bankakerfið svo gengið í gegnum erfiðleika vegna gagnrýni að utan. Þá hafi Landsbankamenn farið í endurskoðun á sinni starfsemi og tekið þá ákvörðun að þeir þyrftu að vera minna háðir lánum á alþjóðamörkuðum en að besta leiðin til að styrkja stöðuna væri að hefja töku innlána. Sú stefnumörkun hafi verið skynsamleg fyrir íslensku bankana. Þegar lausafjárkreppan hefði hafið innreið sína mætti segja að áhrif hennar hafi orðið meiri hér vegna þess að einum bankanna hefði ekki tekist að tryggja sér nægilegt langtímafjármagn í gegnum innlán. Hann væri þó ekki að ásaka neinn.

Halldór fór yfir samskipti bankans við íslenska og breska fjármálaeftirlitið vegna Icesave. Sagði hann að í mars á þessu ári hefðu ákveðnir aðilar reynt að skortselja íslensku banakana en þeir hefðu hrundið því áhlaupi. Í kjölfar þess hefði verið rætt við yfirvöld í Bretlandi sem hefðu farið fram á það að bankinn gripi til aðgerða til að styrkja stöðu sína. Varð það að niðurstöðu að hann myndi leggja meira lausafé í starfsemi Icesave auk þess sem bankinn myndi ekki markaðssetja reikninginn af krafti heldur minnka innistæður og draga þannig úr áhættu. Sagði Halldór að reikningurinn hefði verið 20 prósent lægri í lokin en þegar hann hefði verið mestur.

Breska fjármálaeftirlitið hefði svo í júlí farið fram á það að stofnað yrði dótturfélag um Icesave-reikninginn í Bretlandi. Eftirlitið hefði framkvæmt reglubundna úttekt á bæði Icesave og Heritable-bankanum í sumar. Engar athugasemdir hefðu borist nema þær að passa ætti upp á lausafjárstýringu samstæðunnar.

Halldór sagði að Landsbankamenn hefðu viljað gera Icesave að dótturfélagi í tveimur skrefum en ekki hefði náðst samkomulag um málið í tæka tíð. Þá sagði Halldór að íslenska fjármálaeftirlitð hefði fylgst með þróun mála og hvatt til þess að stofnað yrði dótturfélag vegna Icesave. Enn fremur sagði Halldór að um mánaðamótin september/október hefði breska fjármálaeftirlitð boðið upp á flýtileið vegna Icesave en það hefði ekki náðst.

Þá kom fram í Markaðnum í morgun í máli Jóns Þórs Sturlusonar, aðstoðarmanns Björgvins G. Sigurðssonar viðskiptaráðherra, að málefni Icesave hefðu verið rædd á fundi hans og Alistairs Darling fjármálaráðherra í Bretlandi í byrjun september.