Skuldum Baugs við bankana hugsanlega breytt í hlutafé

Financial Times greinir frá því á vefsíðu sinni að íslenska ríkið íhugi nú að leysa til sín eignarhluti Baugs í nokkrum af þekktustu verslanakeðjum Bretlands, eins og House of Fraser og Hamleys. Samkvæmt fréttinni yrði skuldum Baugs við gömlu bankana þrjá breytt í hlutafé í eigu íslenska ríkisins.

Þessar eignir yrðu síðan seldar aftur síðar meir en afar óheppilegt er að selja verslanarekstur nú í Bretlandi þar sem fjöldi gjaldþrota blasir við í verslunargeiranum þar í landi. Er það sökum fjármálakreppunnar og einhverrar lélegustu jólaverslunar í manna minnum.

Fram kemur að ekki er hægt að hrinda þessu í gang fyrr en búið er að aflétta lögum um hryðjuverk sem enn eru í gildi gagnvart eignum Landsbankans í Bretlandi. Því sé nauðsynlegt að ná samkomulagi við bresk stjórnvöld áður en þessar áætlanir verða að veruleika.