Fjölgun farþega og ferða hjá Strætó

Jórunn Frímannsdóttir skrifar um almenningssamgöngur

Það er margt ánægjulegt að gerast hjá Strætó bs þessa dagana. Aukning hefur orðið í farþegafjölda og ljóst er að þegar harðnar á dalnum líta margir til þess að nýta sér þann frábæra og ódýra samgöngumáta sem strætó er. Gjaldskrá Strætó verður óbreytt sem ætti að koma sér vel hjá mörgum um þessar mundir. Gerðar hafa verið ítarlegar talningar á notkun strætó undanfarið og hafa talningar sýnt að nú síðustu mánuði hefur farþegum fjölgað. Fjölgunin á sér helst stað á annatímum og því nauðsynlegt að auka við þjónustuna á sumum leiðum á annatíma með því að setja inn aukavagna. Það sést vel á súluriti hér að neðan hvernig notkunin er á vögnunum miðað við mismunandi tíma dags.

Fjölgun farþega kallar á fleiri ferðir

Fjölgun farþega kallar á aukna þjónustu, til dæmis í formi aukavagna á ákveðnum tímum. Til þess að mæta þeirri fjölgun sem hefur átt sér stað voru nauðsynlegar ráðstafanir gerðar.

Ákveðið var að fara í nokkurs konar aðlögun leiðakerfisins að notkuninni, þjónustuaðlögun. Þjónustuaðlögunin, sem samþykkt var í stjórn Strætó bs, miðar fyrst og fremst að því að fjölga ferðum á annatíma og miða þjónustuna fyrst og fremst út frá notkun miðað við þær tölulegu upplýsingar sem liggja fyrir. Ferðir farþega eru skilgreindar tvenns konar:

1. Ferðir til og frá vinnu eða skóla þar sem farþeginn er bundinn af því að mæta á ákveðnum tíma. Þá er nauðsynlegt að akstur vagnanna sé tiltölulega þéttur, en þessar ferðir eru aðallega á annatíma.

2. Ferðir farþega sem ekki eru bundnar af ákveðnum föstum tíma, heldur getur farþeginn valið það hvenær hann fer af stað, það eru ferðir utan annatíma.

Við þjónustuaðlögunina var einmitt tekið mið af þessu.

Stjórn Strætó bs er einhuga um að fara í stefnumótunarvinnu til framtíðar fyrir Strætó bs á nýju ári. Stjórnin er sammála um að gera enga byltingu í leiðarkerfinu enda nýbúið að því og notendur nú loks að jafna sig á því öllu saman. Stjórn og stjórnendur munu horfa til þess að laga kerfið sem best að þörfum notendanna. Haldið verður áfram að nota talningar til þess að meta stöðuna og vita hver notkunin er hverju sinni og hvernig hún breytist frá einu tímabili til annars.

Það er afar mikilvægt að skilgreina þjónustuna enn betur en þegar hefur verið gert. Sérstaklega þarf í því sambandi að horfa til þess að:

• skilgreina akstursþéttleika eftir fjölda farþega.

• skilgreina lengd að stoppistöð eftir þéttleika íbúasvæða.

• skilgreina hver hlutur farþega í rekstrinum eigi að vera.

• skilgreina ný markmið um gæði þjónustu og áfram mætti lengi telja.

Þessi vinna mun fara fram í stjórn og hjá stjórnendum Strætó bs á nýju ári. Nauðsynlegt er fara vel yfir þessi mál og fá sem flesta að þeirri vinnu. Sjálfsagt er við svona stefnumótunarvinnu að leita í smiðju nágrannalandanna. Þar er mikil þekking á því hvað gengur upp og hvað ekki í rekstri þjónustu sem okkar. Flest nágrannalönd okkar eru komin mun lengra en við í því að reka almenningssamgöngur og þar er víða að finna sambærilegt þjónustusvæði og það sem Strætó bs er að þjónusta. Þar má finna upplýsingar um hvernig þjónustan er skilgreind eftir mismunandi gerð samfélaga.

Þjónustuaðlögunin sem nú hefur verið samþykkt mun bæta þjónustuna á annatímum en draga lítillega úr þjónustunni utan annatíma. Við stöndum vörð um starfsfólkið og engum verður sagt upp hjá Strætó bs í tengslum við þessar breytingar.

Höfundur er borgarfulltrúi og stjórnarformaður Strætós bs.