Úrslitaleikurinn sýndur í Sambíóunum.

Sambíóin endurtaka leikinn frá því í dag, og opna bíósali sína fyrir landsmönnum þegar Strákarnir okkar mæta Frakklandi á sunnudag. Íslendingar verða líklega með árrisulasta móti þann daginn, en leikurinn hefst korter í átta um morguninn. Hann verður sýndur í Sambíóunum í Álfabakka, á Akureyri og Selfossi. Húsið opnar klukkan sjö.

Það var rífandi stemning á leiknum í dag, og segir Ingi Úlfar Helgason hjá Sambíóunum að fullt hafi verið út úr húsi í öllum þremur bíóhúsunum. Ingi reiknar með að um níu hundruð manns hafi mætt og stutt strákana okkar.