Séra Friðriks minnst

Blómsveigur var lagður að leiði séra Friðriks Friðrikssonar í kirkjugarðinum við Suðurgötu í morgun í tilefni þess að í ár eru 140 ár liðin frá fæðingu hans. Blómsveigurinn er frá fimm félögum sem Friðrik stofnaði á ævi sinni, en þau eru KFUM og K, íþróttafélögin Valur og Haukar, íslenska skátahreyfingin og Karlakórinn Fóstbræður. Nú klukkan tíu hefst svo í Grafarvogskirkju dagskrá tileinkuð séra Friðriki. Þar mun Þórarinn Björnsson, guðfræðingur fjalla um elstu varðveittu ræðu séra Friðriks. Hilmar Foss, skjalaþýðandi og dómtúlkur mun minnast dvalar sinnar í Vatnaskógi með séra Friðriki um 1930. Sigmundur Ernir Rúnarsson, fréttastjóri og skáld mun lesa texta dr. Þóris Kr. Þórðarsonar er birtist í Bókinni um séra Friðrik árið 1968.

Að messu lokinni verður boðið upp á léttar veitingar í safnaðarsal kirkjunnar.