Tvö síðbúin mörk hjá Tottenham

Tottenham bar í dag sigurorð af Portsmouth á heimavelli, 2-0, með mörkum varamannanna Darren Bent og Jamie O'Hara. Hermann Hreiðarsson lék allan leikinn í liði Portsmouth.

Jermaine Jenas átti við smávægileg meiðsli að stríða og kom Tom Huddlestone á miðju Tottenham í hans stað. Þá tók Michael Dawson stöðu Ledley King í vörninni.

Jermain Defoe mátti ekki spila með Portsmouth gegn sínum gömlu félögum og tók því Kanu stöðu hans í sókninni. En alls voru sex breytingar gerðar á liði Portsmouth frá síðasta leik en Hermann Hreiðarsson var í stöðu miðvarðar í dag, við hlið Silvain Distin.

Það er kalt í veðri í Englandi í dag og snjóaði þegar flautað var til leiks í Lundúnum.

Heimamenn virtust mæta ferskari til leiks en Dimitar Berbatov kom boltanum í markið eftir um hálftíma leik eftir stungusendingu Robbie Keane. Hann er þó dæmdur rangstæður en sá dómur stóð afar tæpt í endursýningum.

Michael Dawson átti síðan gott skot að marki skömmu síðar en boltinn hafnaði í slánni.

Tottenham fékk fleiri færi í fyrri hálfleik en það besta átti Sean Davis, leikmaður Portsmouth, en Paul Robinson varði vel frá honum í marki heimamanna.

Svipað var upp á teningnum í seinni hálfleik. Aaron Lennon átti fína rispu snemma í hálfleiknum en skot hans fór farm hjá marki gestanna.

Portsmouth fékk sitt besta færi þegar að Kanu náði að skalla yfir Paul Robinson, markvörð Tottenham, en Didier Zokora náði að bjarga á síðustu stundu.

En ísinn brotnaði loksins á 80. mínútu. Sóknarmenn Tottenham skiptust á að reyna að skjóta að marki sem endaði með því að Dimitar Berbatov átti misheppnað skot að marki en virkaði sem fyrirtaks sending á Darren Bent. Hann skallaði laglega í markið.

Upp úr miðjunni náði Tottenham boltanum strax aftur og þrumað fram á Darren Bent. Hann gerði sér lítið fyrir og stakk Hermann Hreiðarsson af, lagði boltann fyrir markið þar sem Jamie O'Hara kom aðvífandi og skilaði knettinum í netið.

Þar með voru úrslitin ráðin en Portsmouth missti þar með ef til vill endanlega af fimmta sæti deildarinnar en Everton er nú sex stigum á undan Portsmouth og á leik til góða.

Tottenham er enn í ellefta sæti deildarinnar en er nú fjórum stigum á eftir West Ham í stað sjö.