Rúmur helmingur vill taka upp evru

Meirihluti landsmanna, eða tæp 56 prósent, telja að taka eigi upp evru sem gjaldmiðil hér á landi samkvæmt könnun sem Capacent Gallup gerði fyrir Samtök iðnaðarins í lok febrúar. 44 prósent vilja hins vegar halda íslensku krónunni. Tvær kannanir samtakanna í janúar og febrúar sýna enn fremur að um 44 prósent eru hlynnt ESB-aðild um 35 prósent andvíg.

Samkvæmt könnuninni í febrúar eru 43,3 prósent hlynnt aðild að Evrópusambandinu en 35,1 prósent andvíg. Rúmur fimmtungur er hvorki andvígur né hlynntur aðildinni samkvæmt könnuninni. Einnig var spurt um það hvort fólk væri hlynnt eða andvígt aðild Íslands að Evrópusambandinu ef það væri eina raunhæfa leiðin til þess að taka upp evru. Þar sögðust 47,7 hlynnt aðild, rúmur fjórðungur andvígur og 27 prósent voru hvorki hlynnt né andvíg.

Þegar þessar niðurstöður eru teknar saman ásamt fyrri spurningunni um afstöðu fólks til Evrópusambandsins kemur í ljós að tæpur helmingur svarenda, 49,8 prósent, er hlynntur Evrópusambandsaðild en réttur þriðjungur er andvígur. Þá eru tæp 18 prósent hvorki hlynnt né andvíg aðildinni.

Könnunin var lögð fyrir dagana 20.-29. febrúar í gegnum síma og Net og náði hún til 675 manna. Svarhlutfall var 60,5 prósent.

Rúmur helmingur hlynntur aðildarviðræðum

Samtök iðnaðarins gerðu einnig könnun í janúar þar sem spurt var um hvort fólk væri hlynnt því eða andvígt að teknar væru upp aðildarviðræður við Evrópusambandið. Meirihlutinn, eða 54 prósent, var hlynntur aðildarviðræðum, 30 prósent andvíg og tæp 16 prósent hvorki né.

Þar var einnig spurt um hvort fólk væri hlynnt eða andvígt aðild að sambandinu og reyndist 44,1 prósent hlynnt því, 34,3 prósent andvíg og rúmur fimmtungur hvorki andvígur né hlynntur. Munurinn á afstöðu fólks milli mánaða er því ekki mikill.

Janúarkönnunin leiðir einnig í ljós að 47,8 prósent voru hlynnt því að taka upp evru, 39 prósent voru því andvíg og 13 prósent rúm hafa ekki skoðun á því. Stuðningur við evruupptöku hefur því aukist nokkuð á milli mánaða.

Meirihluti telur gott fyrir efnahags Íslands að ganga í ESB

Einnig var spurt um það í könnuninni hvort fólk teldi að aðild að Evrópusambandinu yrði almennt hagstæð eða óhagstæði fyrir lífskjör þess. Meirihluti, eða 53,2 prósent, taldi að aðildin yrði hagstæð fyrir lífskjörin en 26,2 prósent að þau yrðu óhagstæð. Fimmtungur sagði hvorki né.

Enn fremur telja 54 prósent það gott fyrir efnahag Íslands í heild að ganga í Evrópusambandið en tæpur þriðjungur að það slæmt. Þá telja tæp 60 prósent líklegt að Ísland sæki um aðild að Evrópusambandinu en 35 prósent telja það ólíklegt. Af þeim sem sem töldu það líklegt að sótt yrði um aðild nefndu aðeins 15 prósent að það yrði á næstu fimm árum en 38 prósent að það yrði á næstu 5-10 árum og fimm prósent töldu að það yrði síðar.

Janúarkönnunin var gerð á tímabilinu 16.-29. janúar í síma. Úrtakið var 1350 manns á öllu landinu og svarhlutfall 60,3 prósent.

Kannanirnar tvær má nálgast hér að neðan.