Darling óttast ekki málsókn Íslendinga

Alistair Darling, fjármálaráðherra Bretlands, hefur engar áhyggjur af fyrirhugaðri málsókn íslenskra stjórnvalda gegn breskum. Þetta kemur fram í Financial Times í dag þar sem m.a. er greint frá löggjöf þeirri sem samþykkt var á Alþingi rétt fyrir jólin sem gefur heimild til málsóknarinnar.

Darling segir að hann telji það ábyrga ákvörðun að beita hryðjuverkalöggjöf landsins til að vernda innstæður Breta í íslensku bönkunum í haust. Samkvæmt Financial Times er talið að málsókn þessi verði blásin af ef Bretar samþykki að beita ekki refsivöxtum á rúmlega 2 milljarða punda lán sitt til Íslendinga, eða hátt í 400 milljarða kr., en lánið var notað til að borga innstæðurnar á Icesave-reikningum Landsbankans.