Stofnun embættis héraðssaksóknara frestað um ár

Stofnun nýs embættis héraðssaksóknara hefur verið frestað um ár en lögin áttu að taka gildi 1. janúar 2009. Vísir greindi frá því í september að gildistökunni yrði að öllum líkindum frestað.

Frestunin er til komin vegna þeirra aðstæðna sem nú eru uppi í ríkisfjármálum. Allsherjarnefndi áréttar þá afstöðu sína að efling ákæruvaldsins með stofnun embættis héraðssaksóknara er mikilvægt framfaraskref og leggur því áherslu á að hér er aðeins um að ræða frestun til eins árs.

Samkvæmt lögum um meðferð sakamála sem samþykkt voru á Alþingi síðastliðið vor verður ákæruvaldið þrískipt. Embætti héraðssaksóknara er ætlað að taka ákvörðun um saksókn á fyrsta stjórnsýslustigi í nánast öllum meiri háttar sakamálum.

Samkvæmt lögunum er gert ráð fyrir því að héraðssaksóknara til aðstoðar verði varahéraðssaksóknari og saksóknarar en ráðherra ákveður fjölda þeirra í samráði við ríkissaksóknara. Við embættið skal vera sérstök deild skatta- og efnahagsbrota.