Segja Baggalúts-texta ekki fjalla um eðlilega hegðun í samskiptum kynjanna

Femínistafélag Íslands hefur sent frá sér yfirlýsingu vegna texta við lags Baggalúts, Þjóðhátíð '93, þar sem félagið segist harma umræðu undanfarna daga sem sé á þá leið að umræddur texti snúist um eðlilega hegðun í samskiptum kynjanna.

"Leiddar hafa verið að því líkur að eitthvað hljóti að vera að hjá fólki sem sér ofbeldistilvísanir og kvenfyrirlitningu út úr textanum. Við bendum á að kynferðisofbeldi er útbreitt í íslensku samfélagi og að stórátaks sé þörf svo unnt sé að sporna við því. Til að útrýma kynferðisofbeldi er nauðsynlegt að byggja upp samfélag jafnréttis og virðingar á milli kynja.

Telja Baggalút senda strákum þau skilaboð að þeim beri að notfæra sér ölvunarástand kvenna

Mikil umræða skapaðist stuttu eftir að lagið kom út þegar Vísir fjallaði um textann og ræddi m.a. við Hjálmar Sigmarsson, ráðskonu Karlahóps Femínistafélagsins. Sagði Hjálmar textann full mikið af hinu góða og taldi textann beinlínis tala um nauðganir sem hluta af verslunarmannahelginni.

Baggalútur svaraði fullum hálsi og þvertók fyrir allar slíkar ásakanir. Sögðust þeir einfaldlegar syngja um raunveruleikann eins og hann blasir við og þrátt fyrir að textinn væri á tímum kærulaus ætti á engan hátt að fjalla um nauðganir á neinn hátt og hvað þá á jákvæðan hátt.

Samkvæmt yfirlýsingu Femínistafélagsins ,,er það skaðlegur boðskapur að senda strákum þau skilaboð að þeim beri að notfæra sér ölvunarástand kvenna, eins og fjallað er um í textanum. Slíkt gengur þvert á hugmyndir um kynfrelsi einstaklinga. Því tökum við undir þær áhyggjur sem lýst hefur verið að textinn geti fjallað um eða réttlætt kynferðisofbeldi.

Við hvetjum til ábyrgrar kynhegðunar þar sem ánægja og vellíðan þátttakenda sem ganga fúsir til leiks er markmiðið. Að lokum óskum við landsmönnum öllum ánægjulegrar verslunarmannahelgar."