Forsætisráðherra Lúxemborgar vill hjálpa Kaupþingi

Jean-Claude Juncker, forsætisráðherra Lúxemborgar, segir að landið verði að koma Kaupþingi þar í landi til aðstoðar. Jafnframt verði Lúxemborg að tryggja innistæður Belga á reikningum Kaupþings til þess að viðhalda traustinu á Lúxemborg sem fjármálamiðstöðvar.

Þetta kemur fram í viðtali sem blaðið Luxemburger Wort birtir við Juncker í dag. Viðtalið var tekið skömmu áður en Juncker átti fund með forsætisráðherra Belgíu til að ræða sameiginlegar björgunaraðgerðir landanna til handa Kaupþingi.

Kaupþing í Lúxemborg var móðurfélag bankans í Belgíu og því ber stjórnvöldum í Lúxemborg skylda til að tryggja innistæður Belga.