Lottomatica Roma nálgast 16-liða úrslitin

Ítalska liðið Lottomatica Roma tók stórt skref í átt að 16-liða úrslitum Meistaradeildar Evrópu í gær með sigri á Brose Baskets á útivelli, 73-59.

Jón Arnór Stefánsson lék ekki með Rómverjum í gær þar sem hann er með rifinn liðþófa í hné og verður frá í einhverjar vikur af þeim sökum.

Roma var með sex stiga forystu í hálfleik, 32-26, og sigldi hægt og rólega fram úr andstæðingi sínum allt til loka.

Lottomatica er enn í sjötta sæti C-riðils en fimm efstu liðin í öllum riðlum komast áfram í 16-liða úrslitin ásamt því liði sem stendur best í sjötta sæti í riðlunum þremur.

Þar stendur Lottomatica ágætlega að vígi en enn eru þrjár umferðir eftir af riðlakeppninni.