Danske Bank nefndur sem kaupandi að Carnegie

Danske Bank hefur verið nefndur sem hugsanlegur kaupandi Carnegie fjárfestingabankans. Sænska ríkið vill losa sig við Carnegie hið fyrsta en bankinn var þjóðnýttur í gær, mánudag.

Í frétt um málið á börsen.dk er haft eftir Peter Normann, sem vænst er að sænska ríkið útnefni sem forstjóra bankans, að fyrstu áætlanir geri ráð fyrir að bankinn verði seldur í heilu lagi.

Normann á von á því að salan á Carnegie muni liggja ljós fyrir á næstu vikum enda telur hann að áhugi sé fyrir kaupunum. Sérfræðingar eru ekki sammála um að auðvelt verði að selja bankann í heilu lagi en telja að verulegur áhugi sé á einstökum deildum hans.

Þannig telur Mats Anderson óháður bankagreinandi að líklegast muni Carnegie verða seldur í bútum. Hann nefnir að SEB, Danske Bank og DNB Nor muni að öllum líkindum bítast um eignastýringardeild Carnegie.