Heyrði hrikaleg hljóð og sá blóðuga unglinga

Áslaug Þóra Harðardóttir, íbúi í Grundargerði, þar sem eldur kveiknaði út frá gasi í skúr í kvöld sagði í seinnifréttum Ríkissjónvarpsins að hún hafi heyrt mikla sprengingu og talið að um jarðskjálfta hafi verið að ræða. Fljótlega hafi hún áttað sig á því að svo væri ekki því hún heyrði mikil hróp og hrikaleg hljóð. Í framhaldinu hafi blóðug ungmenni flúið frá slysstaðnum. Sjálf hafi hún aðstoðað brennda stúlku.

Sex ungmenni voru flutt á slysadeild fyrr í kvöld og samkvæmt upplýsingum lögreglu eru fjögur þeirra talsvert slösuð.

Gunnar Örn Pétursson, varðstjóri hjá slökkviliði höfuðborgarsvæðisins, sagði í samtali við Rúv að allt tiltækt lið hafi verið kallað til því strax hafi verið á reiki hversu margir hafi verið í skúrnum og nágrenni hans þegar hann sprakk. Gunnar sagði að virtist sem að 10 til 12 ungmenni hafi verið fyrir utan skúrinn.

70 til 80 björgunarsveitamenn frá fimm björgunarsveitum Slysavarnafélagsins Landsbjargar aðstoða nú lögreglu við að leita af sér grun um að fleiri unglingar séu slasaðir eftir sprenginguna.

Bústaðakirkja hefur verið opnuð fyrir þá sem voru á slysstað í kvöld og aðstandendur þeirra. Þar verður upplýsingum safnað saman og sálræn aðstoð veitt.