Slagveður og átta stiga hiti á aðfangadag

Það verður ekki glæsilegt jólaveðrið ef marka má spá Sigurðar „Storms" Ragnarssonar veðurfræðings Stöðvar 2. Átta stiga hiti, rigning og hávaðarok.

Síðustu daga þótti örlítil glæta á því að snjólög norðanlands lifðu slagveðrið af, en Siggi segir alveg útséð um að svo verði ekki.

Siggi segir ekki alla von úti enn. Á jóladag sé útlit fyrir að kólni, og því örlítil vonarglæta að landsmenn fái að njóta hvítra jóla þann daginn. Veðurguðirnir bjóða þó ekki upp á neina mjúka og jólalega kattaloppudrífu, því líklega verður ofankomin í formi élja.

Siggi segir of snemmt að segja til um hvað veðurguðirnir ætla að gera af sér um áramótin, en er vongóður á að þeir bjóði upp á eitthvað betra en jólaveðrið.