Örn bætti ekki Íslandsmet sitt - Myndir

Örn Arnarson náði ekki að bæta Íslandsmet sitt í 100 metra skriðsundi á Ólympíuleikunum í Peking þar sem hann hefur nú lokið keppni.

Hann synti á 50,68 sekúndum sem er 0,71 sekúndu frá Íslandsmeti hans sem hann setti á Smáþjóðaleikunum í Mónakó í fyrra. Hann synti á áttundu braut í fimmta riðli og varð í áttunda og síðasta sæti. Alls varð hann í 49. sæti af 64 keppendum.

Örn byrjaði vel í sundinu og var á ágætum tíma í snúningnum. Hann náði hins vegar ekki að fylgja því eftir og dróst aftur úr á síðustu fimmtán metrunum.

Þetta var síðasta grein Arnar á Ólympíuleikunum í Peking en á sunnudaginn varð hann í 35. sæti af 45 keppendum í 100 metra baksundi. Hann var þá þeim tíma sem hann var skráður á í sundið og tæpri hálfri sekúndu frá Íslandsmeti sínu.