Reykjanesbær vill meirihluta í Hitaveitu Suðurnesja

Reykjanesbær stefnir að því að eignast meirihluta í Hitaveitu Suðurnesja hf. í kjölfar sameiningar Reykjavik energy invest og Geysir green energy. „Samhliða sameiningu stærstu útrásafyrirtækja landsins í jarðvarmanýtingu á erlendri grund, skapast tækifæri til að vinna í anda hugmynda um uppskiptingu á innlendum orkufyritækjum," segir í tilkynningu frá Reykjabesbæ.

Uppskipting orkufyrirtækjanna er sögn snúa annars vegar að að einkaleyfabundinni starfsemi eins og rekstri dreifikerfa sveitarfélaga og smásölu til þeirra og hins vegar að samkeppnis- og áhætturekstri, eins og framleiðslu raforku og heildsölu hennar.

„Reykjanesbær hefur unnið að samkomulagi við hina nýju eigendur REI sem miðar að því að Reykjanesbær eignist meirihluta í Hitaveita Suðurnesja hf. sem eigi dreifikerfi sveitarfélaganna og sinni smásölu inn á kerfin." Með þessu yrði tryggt að þjónusta við almenning svo sem vatn, hiti, rafmagn og frárennsli verði að meirihluta í almannaeigu.

Samkeppnisrekstur á borð við virkjanastarfsemi, verður hins vegar áfram í meirihlutaeigu REI. „Stefnt er að því að Hitaveita Suðurnesja muni með stjórnendum sínum og öllu starfsfólki einnig sinna framleiðsluþættinum, annars vegar sem eigandi dreifikerfa og hins vegar sem rekstraraðili á virkjunum. Þetta þýðir að starfsmenn munu finna fyrir litlum breytingum á högum sínum en líklegt er að fjölga þurfi fólki."

Þá er einnig gert ráð fyrir að Reykjanesbær eigi einnig hlut í félagi um framleiðslumannvirkin en þau yrðu að meirihluta í eigu REI. „Kjósi önnur sveitarfélög á svæðinu að leggja inn önnur dreifikerfi í Hitaveitu Suðurnesja s.s. vatns- og fráveitur, stendur til að bjóða þeim að fylgja því eftir með eignaraðild í Hitaveitu Suðurnesja hf."

Bæði Hitaveita Suðurnesja hf og starfshluti REI, sem snýr að virkjunum á svæðinu verða staðsett í nýjum höfuðstöðvum Hitaveitu Suðurnesja hf. að Fitjum.

„Í viðræðum við forsvarsmenn REI hefur komið skýrt fram að vilji er til að auka starfsemi REI á svæðinu, sérstaklega í tengslum við þróunarverkefni á sviði viðskiptatækifæra og tækni," segir í tilkynningunni.

„Vegna útrásarverkefna REI og tengsla fyrirtækisins við Hitaveitu Suðurnesja hf. er líklegt að starfsfólki fyrirtækisins muni fjölga, sem gætu þá tengst tímabundið þróunarverkefnum, ekki síst erlendis. Þá eru allir samstarfsaðilar áhugasamir um að efla rannsóknar- og þróunarstarf í tengslum við háskólafélagið Keili á Vallarheiði. Nú er unnið að útfærslu nánara samkomulags á milli Reykjanesbæjar, Hitaveitu Suðurnesja hf. og REI um framangreind mál og stefnt að því að tillögur liggi frammi fyrir næsta bæjarstjórnarfund þann 16. október, " segir að lokum.