32 Breiðavíkurdrengir hafa þegið aðstoð

Þrjátíu og tveir fyrrverandi vistmenn Breiðavíkurheimilishins hafa fengið meðferð á vegum geðsviðs Landspítalans eftir að ríkisstjórnin ákvað snemma á árinu að skipa sérstakt teymi vegna málsins.

Í kjölfar mikillar og opinskárrar umfjöllunar í fjölmiðlum í febrúar um meint líkamlegt og kynferðislegt ofbeldi sem fyrrverandi vistmenn Breiðavíkurheimilisins kváðust hafa orðið fyrir var ákveðið að skipa þverfaglegt teymi á geðsviði Landspítalans til að meta þörf þeirra fyrir aðstoð. Í framhaldi var geðsviði Landspítala falið að taka á móti vistmönnum sem þyrftu á sálfræðimeðferð að halda.

Í fyrstu var aðstoðin einungis bundin við fyrrverandi vistmenn Breiðavíkurheimilisins og því var breytt í lok maí og aðstoðin jafnframt boðin þeim er dvalið höfðu á öðrum vistheimilum eða stofnunum, sem reknar hafa verið af framlögum ríkis eða sveitarfélaga, og sem töldu sig hafa þurft að þola ofbeldi af hálfu starfsmanna eða annarra vistmanna.

Fram kemur í svari heilbrigðisráðherra að þjónustan við fyrrverandi vistmenn upptökuheimila hafi farið fram utan spítalans hjá sálfræðingum sem hefðu reynslu af meðferð sams konar mála. Boðið hefur verið upp á sálfræðimeðferð í allt að tíu skipti í byrjun fyrir hvern einstakling og að þeim loknum lagt mat á þörf fyrir frekari aðstoð í samráði við teymið

Þeim fyrrverandi vistmönnum sem virtust vera í þörf fyrir bráðaþjónustu var boðið að koma umsvifalaust á göngudeild geðsviðs, bráða- og ferlideild, við Hringbraut þar sem þeir fengu viðeigandi aðstoð.

Í svari heilbrigðisráðherra kemur einnig fram að gera megi ráð fyrir að einhverjir þessara skjólstæðinga þurfi á langtímameðferð að halda, þ.e. reglulegum viðtölum í meira en ár, en erfitt sé að gera sér grein fyrir hversu margir það séu á þessari stundu.