Lottomatica Roma steinlá í Meistaradeildinni

Jón Arnór Stefánsson skoraði fimm stig er Lottomatica Roma tapaði fyrir frönsku meisturunum í Chorale Roanne í Meistaradeild Evrópu í kvöld, 104-85.

Leikurinn var gríðarlega mikilvægur þar sem bæði lið voru aðeins búin að vinna einn leik fyrir umferð vikunnar.

Roma er nú í næstneðsta sæti riðilsins með einn sigur eftir sjö leiki. Panathinaikos er enn ósigrað í toppsæti riðilsins.

Jón Arnór var í byrjunarliðinu í kvöld og lék í rúmar 30 mínútur. Hann nýtti aðeins eitt ef sex skotum sínum utan af velli og þrjú af fjórum vítatilraunum. Hann tók tvö fráköst og gaf tvær stoðsendingar.