Thain tekur við Merrill Lynch

John Thain hefur verið ráðinn forstjóri Merrill Lynch, stærsta verðbréfamiðlunarfyrirtæki Bandaríkjanna, og er honum ætlað að koma því á réttan kjöl eftir erfiðleika að undanförnu.

Thain hefur verið forstjóri NYSE Euronext, hinnar tiltölulega nýsameinuðu kauphallar New York í Bandaríkjunum og samevrópsku kauphallarsamstæðunnar Euronext, og þá stýrði hann einnig Goldman Sachs bankanum.

Merrill Lynch varð illa úti í fjármálakreppunni sem riðið hefur yfir markaði á seinni hluta ársins. Tapaði félagið jafnvirði 480 milljarða íslenskra króna á þriðja ársfjórðungi. Þetta er fyrsta tap bankans í sex ár sem að mestu leyti er tilkomið vegna afskrifta í tengslum við fasteignalán bankans. Slæm afkoma bankans leiddi til þess að Stanley O'Neal, fyrrverandi forstjóri bankans, varð að taka poka sinn í lok síðasta mánaðar.