Fullyrðingar um verðsamráð kallar á flýtimeðferð rannsóknar

Neytendasamtökin telja fullyrðingar um verðsamráð á matvörumarkaði sem birst hafi í fjölmiðlum kalla á flýtimeðferð á rannsókn Samkeppniseftirlitsins á matvörumarkaðnum sem nú standi. Í frétt á vef samtakanna er bent á að verðsamráð sé alvarlegasta brotið á samkeppnislögum.

Þá segja Neytendasamtökin það mjög alvarlegt ef rétt sé að matvöruverslanir hafi rangt við í verðkönnunum og plati um leið neytendur. Ef rétt reynist séu verslanir bæði að brjóta gegn samkomulagi um framkvæmd verðkannana og lög um óréttmæta viðskiptahætti og gagnsæi markaðarins.

Í þeim lögum segir meðal annars: „Óheimilt er að veita rangar, ófullnægjandi eða villandi upplýsingar í auglýsingum eða með öðrum hætti eða beita öðrum slíkum viðskiptaaðferðum sem sama marki eru brenndar, enda séu upplýsingar þessar og viðskiptaaðferðir fallnar til að hafa áhrif á eftirspurn eða framboð vara, fasteigna, þjónustu eða annars þess sem haft er á boðstólum í atvinnustarfsemi sem lög þessi taka til."

Þá segja Neytendasamtökin að verðkannanir séu nauðsynlegar og að tryggja verði að einstaka verslanir geti ekki spilað með verðkannanir og að neytendur verði upplýstir um slíkt. Hagar og Samtök verslunar og þjónustu annars vegar og ASÍ hins vegar hafi deilt um verðkannanir ASÍ að undanförnu en Neytendasamtökin segja að ASÍ hafi í gegnum árin staðið sig vel í sínu verki.

Stjórnvöld styðji óháðar verðkannanir

 

Leggur stjórn Neytendasamtakanna áherslu á að verðkannanir og verðsamanburður verði sem auðveldastur fyrir neytendur. „Þetta þarf að gera með því að bera saman verð í verslunum og birta verð með nöfnun verslana opinberlega. Það má vel vera að hægt sé að bæta viðbótarupplýsingum fyrir neytendur eins og viðskiptaráðherra hefur látið Neytendastofu kanna. Þar yrði byggt á rafrænum upplýsingum sem verslanirnar eiga og verða að heimila notkun annarra aðila á, en slík heimild liggur ekki fyrir. Minnt er einnig á að Hagstofan gefur út góðar upplýsingar um verðþróun hér á landi og einnig í samanburði við önnur Evrópulönd. Það má byggja upp margvíslega upplýsingagjöf til neytenda og minnir stjórnin á að mikilvægt sé að Hagstofan byrji að skrá hreina heildsöluvísitölu neysluvöru. Hægt væri að lesa mikilvægar upplýsingar úr slíku og ekki vanþörf á þegar heildsalar og smásalar takast á vegna verðbreytinga," segir á vef Neytendasamtakanna.

Hvetja samtökin stjórnvöld til að styðja við óháðar verðkannanir sem hafi það eitt að markmiði að veita neytendum sem bestar upplýsingar um verð á vörum í. Það sé óásættanlegt gagnvart neytendum ef verðkönnunum verði úthýst úr ákveðnum verslunum og markaðsráðandi öflum þannig látið eftir hvernig upplýsingum um verð á vörum sé komið á framfæri við neytendur.