Frakki verður framkvæmdastjóri Alþljóðagjaldeyrissjóðsins

Dominique Strauss-Kahn hefur verið tilnefndur nýr framkvæmdastjóri Alþjóðagjaldeyrissjóðsins. Búist hafði verið við því að þessi fyrrverandi fjármálaráðherra Frakka og jafnaðarmaður í flrönskum stjórnmálum fengi stöðuna.

Josef Tosovsky fyrrum forsætisráðherra Tékka sóttist einnig eftir starfinu og hafði stuðning Rússa. Strauss-Kahn hafði hins vegar stuðning bæði Evrópu og Bandaríkjanna sem ráða að mestu ríkjum í bankanum.

Nýji forsetinn var í Chile þegar ákvörðun stjórnar sjóðsins var tilkynnt. Þar sýndi hann á táknrænan hátt vilja sinn til að leyfa vaxandi hagkerfum þróunarríkja að hafa áhrif á meiriháttar ákvörðunanir bankans.

Í tilkynningu sagðist hann vera ákveðinn í að gera nauðsynlegar endurbætur innan bankans hið fyrsta. Þannig gæti fjárhagslegur stöðugleiki komi alheiminum að gagni á sama tíma og hlúð væri að vexti og auknum atvinnutækifærum.

Rodrigo de Rato fráfarandi forseti lætur af embætti af persónulegum ástæðum. Hann fagnaði tilnenfningu Strauss-Kahn og sagði hann búa yfir reynslu, framtíðarsýn og hollustu við almenning. Það væru nauðsynlegir eiginleikar forseta sjóðsins.

Strauss-Kahn er 58 ára. Hann sóttist eftir að vera forsetaefni franska jafnaðarmannaflokksins í síðustu forsetakosningum, en Segolene Royal hafði betur. Hann tekur við stjórn Alþjóðagjaldeyrissjóðsins 1. nóvember næstkomandi og mun gegna því í fimm ár.

Nicolas Sarkozy forseti Frakklands segir tilnefninguna mikinn sigur fyrir franska stjórnmálamenn.

Hlutverk Alþjóðagjaldeyrissjóðsins er að veita þróunarríkjum aðstoð og stuðning til að stuðla að alþjóðlegu fjárhagslegu jafnvægi. Gagnrýnendur segja þó að ríkar þjóðir hafi of mikil áhrif á bankann á kostnað landa í miklum efnahagsblóma, eins og Kína og Indlandi.

Strauss-Kahn hefur metnaðarfull markmið um að breyta núverandi fyrirkomulagi og segir valdabandalag Bandaríkjanna og Evrópu á hallanda fæti.