Kiel vann stórsigur á Gummersbach

Kiel styrkti stöðu sína á toppi þýsku úrvalsdeildarinnar í handbolta í kvöld með öruggum útisigri á Íslendingaliði Gummersbach 42-37. Heimamenn voru einfaldlega skrefinu á eftir ógnarsterku liði Kiel allan leikinn, fyrir framan metfjölda áhorfenda í Kölnarena - 19.403 áhorfendur sáu leikinn.

Kiel hafði fimm marka forskot í hálfleik 23-18 og hélst sá munur á liðunum fyrstu mínúturnar í þeim síðari. Gummersbach náði að minnka muninn í eitt mark með góðri rispu í upphafi síðari hálfleiks, en gestirnir gerðu út um leikinn með því að ná 10 marka forskoti um miðjan síðari hálfleik og eftir það var sigurinn aldrei í hættu hjá Kiel.

Það var ekki síst breiddin sem færði gestunum sigurinn í kvöld en það var sama hvaða menn komu inn af bekknum hjá Kiel - allir gátu þeir lagt sitt af mörkum í leiknum. Besta dæmið um þetta var þýska skyttan Christian Zeitz, sem skoraði 4 mörk með sannkölluðum þrumufleygum á stuttum tíma í síðari hálfleik. Þá voru markverðir Kiel í miklu stuði og þegar liðið spilar svona vel, eru fá - ef einhver - lið í heiminum sem standast þeim snúning.

Róbert Gunnarsson var markahæstur í liði Gummersbach með 9 mörk og nýtti færin sýn prýðilega, Daniel Narcisse skoraði 8 mörk, Momir Ilic 7 og þeir Alexandros Alvanos og Guðjón Valur 5 hvor. Guðjón Valur náði sér ekki á strik í leiknum og hafði það mikið með varnarleik Kiel að gera, þar sem liðið virtist staðráðið í að klippa íslenska markakónginn út úr leiknum.

Nikola Karabatic skoraði 10 mörk fyrir Kiel, Vid Kavticnik 8, Dominik Klein og Kim Andersson 6, Christian Zeitz og Markus Ahlm 5.

Tveir aðrir leikir fóru fram í þýsku úrvalsdeildinni í kvöld. Magdeburg vann öruggan sigur á Balingen á heimavelli 30-21 og Íslendingalið Lemgo skellti Melsungen á útivelli 27-26 þar sem Florian Kehrmann skoraði 10 mörk fyrir Lemgo, en Ásgeir Örn Hallgrímsson komst ekki á blað.

Kiel er á toppi úrvalsdeildarinnar með 42 stig, Flensburg í öðru með 39 stig, Hamburg í þriðja með 38 eins og Gummersbach og Magdeburg er svo í fimmta sætinu með 37 stig. Hamburg og Magdeburg eiga leik til góða.