Iniesta: Þetta verður stríð

Miðjumaðurinn Andres Iniesta hjá Barcelona blæs í herlúðra fyrir leikinn gegn Liverpool á Anfield annað kvöld þar sem Börsunga bíður erfitt verkefni eftir 2-1 tap á heimavelli í fyrri leik liðanna í 16-liða úrslitum Meistaradeildarinnar.

"Úrslit í Meistaradeildinni ráðast ekki í einum leik og við erum tilbúnir í stríð, rétt eins og í fyrri leiknum. Við erum allir gríðarlega vonsviknir yfir því að hafa tapað fyrir Sevilla í deildinni, en allt annað verður uppi á teningnum á þriðjudagskvöldið þegar við mætum til Liverpool," sagði Iniesta.

"Við getum ekki slakað á í eina sekúndu," sagði Frank Rijkaard, þjálfari Barcelona. "Leikurinn á Anfield verður gríðarlega erfiður og við verðum að berjast harðar en nokkru sinni fyrr ef við eigum að fara áfram."