Selur blíðu sína í Reykjavík

Vefsíða rússneskrar fylgdarþjónustu auglýsir Reykjavíkurheimsókn ungrar stúlku sem hingað mun komin gagngert til að selja blíðu sína. Hægt er að panta heimsókn til hennar á einu kunnasta hóteli borgarinnar í gegnum síðuna. Þar má finna ítarlegar upplýsingar um verð og fjölbreytta kynlífsþjónustu hennar og annarra kvenna.

Svo virðist sem rússnesk fylgdarþjónusta hafi sent konuna, sem kallar sig Ornellu, til Reykjavíkur í nokkra daga til að selja blíðu sína. Á vefsíðunni filles.ru má sjá nána útlistun á þeirri fjölbreyttu kynlífsþjónustu sem hún veitir og fer ekki á milli mála við hvað er átt. Verðlistin er ítarlegur og skipt milli kostnaðar í Rússlandi og síðan borgarferðum líkt og hún er nú í. Klukkutíminn er tvö hundruð og fimmtíu evrur utan Rússlands - sem gerir um tuttugu og eitt þúsund íslenskar krónur - en tvö hundruð evrur í Rússlandi - tæpar sautján þúsund krónur. Á vefsíðunni er Ornella sögð tuttugu og þriggja ára, áköf og með mikla kynorku.

Hægt er að bóka tíma hjá henni í dag næstu þrjá daga rafrænt í gegnum vefsíðuna og það gerði fréttastofa Stöðvar 2. Fékk fréttmaður síðan smáskilaboð með upplýsingum um hvar ætti að mæta. Pöntunin var gerð með tæplega klukkustundar fyrirvara.

Vefsíða fylgdarþjónustu Ornellu var auglýst á einkamálasíðunum private.is og einkamal.is og voru auglýsingarnar þar enn inni þegar fréttastofa kannaði það síðdegis.