Marorka færir út kvíarnar

Hátæknifyrirtækið Marorka og svissneska fyrirtækið Aqua­metro hafa gert með sér samstarfssamning um markaðssetningu á eldsneytisstjórnunarkerfi fyrir skip. Skrifað var undir samstarfssamninginn á föstudaginn var. Eldsneytis­stjórnunarkerfið er staðlað kerfi sem hentar öllum tegundum skipa sem ganga fyrir svartolíu.

Í fréttatilkynningu frá Marorku segir að með tilkomu samningsins opnist ný og spennandi markaðssvæði fyrir Marorku sem í dag starfar á Íslandi, í Noregi og Danmörku. Hingað til hafi fyrirtækið einbeitt sér að markaðssetningu orkustjórnunarkerfa til skipaútgerða við Norður-Atlantshaf. Samstarfið við Aquametro opni aftur á móti leið fyrir Marorku að skipasmíðastöðvum í Asíu. Þá muni Aquametro framvegis notast við hugbúnað frá Marorku við markaðssetningu allra kerfislausna sinna.