Utanríkisráðuneytið ætlar að skoða mál Erlu Óskar

"Næsta skref er að setjast niður með starfsmönnum utanríkisráðuneytisins," segir Erla Ósk Arnardóttir markaðsstjóri sem upplifði hreina martröð um helgina þegar hún hugðist heimsækja Bandaríkin með vinkonum sínum.

Við komuna til Bandaríkjanna var henni tjáð að þar sem hún hefði árið 1995 dvalið þremur vikum lengur en dvalarleyfi hennar leyfði yrði henni vísað úr landi. Það var þó ekki gert fyrr en eftir margra tíma yfirheyrslur á flugvellinum. Þegar þeim var lokið var Erla svo flutt handjárnuð á höndum og fótum í fangelsi. Þar þurfti hún að dúsa þar til hún var flutt járnuð að brottfararhliði Flugleiða á JFK flugvelli.

Þá var Erla búin að vera í haldi bandarískra yfirvalda í meira en 15 tíma. Hún fékk einu sinni að borða á þessum tíma, hafragraut og brauð.

Fjölmargir Íslendingar hafa lesið frásögn Erlu af þessari hræðilegu upplifun á bloggi hennar. Í samtali við Vísi sagðist Erla vera íhuga stöðu sína. Hún sagði að fjölskylda sín hefði verið í sambandi við utanríkisráðuneytið og starfsmenn þar á bæ hafi haft frumkvæðið af því að koma á fundi við Erlu. Sjálf segist hún binda vonir við að málin skýrist nokkuð á þeim fundi og mun ekki aðhafast frekar fyrr en að honum loknum.