Gripinn við inn­brot og bíl ekið inn í búð

Þetta kemur fram í dagbók lögreglu frá klukan 17 í gær til 5 í morgun.

Lögreglu barst tilkynning um mann sem hafði brotist inn í fyrirtæki í miðborginni en yfirgefið vettvang þegar hann áttaði sig á því að enn væri fólk í húsinu. Lögreglan hafði upp á manninum skömmu síðar þar sem hann var að reyna að brjótast inn í bíl og var hann vistaður í fangaklefa.

Þá handtók lögregla mann sem var grunaður um ólöglega dvöl í landinu og að hafa starfað hér án leyfis. Viðkomandi var vistaður í fangaklefa.

Einnig barst lögreglu tilkynning um að eldur hefði kviknað í íbúð. Lögregla og slökkvilið fóru á vettvang og þá reyndist minniháttar eldur hafa kviknað vegna eldhúsrúlluhaldara sem stóð á eldavélinni.

Ekið á móti umferð, ekið of hratt, bíl ekið inn í búð

Lögregla þurfti að veita ökumanni eftirför en hann hlýddi ekki stöðvunarmerkjum lögreglu og ók í burtu á miklum hraða, meðal annars á móti umferð. Lögregla hafði á endanum hendur í hári viðkomandi og var hann handtekinn grunaður um akstur undir áhrifum áfengis og vistaður í fangaklefa.

Fjórir aðrir menn voru handteknir grunaðir um ölvun við akstur og umferðaróhapp eftir að bíl var ekið inn í verslun. Mennirnir voru allir vistaðir í klefa í þágu rannsóknar sem snýr meðal annars að því hver var að aka bílnum þegar hann endaði inn í versluninni.

Loks var ökumaður sviptur ökuréttindum eftir að hafa mælst á 104 km/klst þar sem hámarkshraði er 80 km/klst.