Fjörutíu prósenta forskot

Úrvalsvísitala Kauphallar Íslands hefur hækkað um tæplega þrjátíu og sex prósent það sem af er ári og hefur hækkað meira en úrvalsvísitölur í öllum samanburðarlöndum. Næstbesta ávöxtun hefur hin þýska DAX-vísitala gefið, rúmlega tuttugu og tvö prósent.

Úrvalsvísitalan stendur nú í 8687 stigum, þrátt fyrir að hafa lækkað um 0,17 prósent í gær. Vísitalan hefur verið á fleygiferð upp á síðkastið, hækkað um rúmlega sex prósent það sem af er júlímánuði og um rúm níu prósent síðastliðinn mánuð.

Norska OBX-vísitalan hefur hækkað um rúm sautján prósent á árinu og hin finnska OMXH25 um rúm fimmtán prósent. OMXC20-vísitala kauphallarinnar í Kaupmannahöfn hefur gefið tæplega fjórtán prósenta ávöxtun og OMXS30 í Stokkhólmi þrettán prósent. NASDAQ 100-vísitalan í New York hefur hækkað um rúm þrettán prósent og FTSE 100 í Lundúnum um tæplega átta prósent.

Sérfræðingar segja Úrvalsvísitölu Kauphallarinnar ekki að fullu samanburðarhæfa við helstu hlutabréfavísitölur erlendis. Félög hér á landi séu flest minni og í miklum vexti, meðan burðarfélög erlendra vísitalna eru mörg hver rótgróin og hreyfast lítið. Þar af leiðandi séu vaxtarmöguleikar hér á landi meiri en víðast hvar annars staðar.

Katrín Friðriksdóttir, forstöðumaður fyrirtækjagreiningar Landsbankans, segir íslensku vísitöluna samsetta af félögum sem flest eigi það sameiginlegt að hafa verið í miklum fyrirtækjakaupum „Félögin í vísitölunni hafa mörg hver verið að vaxa hratt og mikið. Á erlendum mörkuðum er hins vegar meira um rótgróin félög sem kannski eru ekki í jafnmiklum vaxtarham og þau íslensku."

Katrín tekur þó fram að ef einstök félög í erlendum hlutabréfavísitölum séu skoðuð sé ekki einsdæmi að sjá hækkanir á borð við þær sem orðið hafa á þeim íslensku félögum sem hvað hraðast hafa vaxið. „Ef við lítum til Norðurlandanna sjáum við félög á borð við Skania, Volvo og Orkla sem hafa hækkað hratt það sem af er ári. Munurinn er sá að markaðurinn hér er einsleitari að því leyti að félögin hafa verið að vaxa hraðar en gengur og gerist á mörkuðum erlendis. Þess vegna sjáum við meiri hækkanir hér en annars staðar."