Páll Kristins: Við erum ekki hræddir við neitt

Páll Kristinsson átti fínan leik í kvöld þegar hans menn í Grindavík lögðu Njarðvík öðru sinni og knúðu fram oddaleik í undanúrslitum Iceland Express deildarinnar. Hann segir Grindvíkinga klára í verkefnið á fimmtudaginn.

"Þetta var hörkuleikur út í gegn og við vorum bara tilbúnir í kvöld. Vörnin og baráttan skiptir öllu máli í þessu. Við erum tilbúnir í oddaleik í Njarðvík og erum búnir að vera á góðri siglingu undanfarið. Við erum ekki hræddir við neitt. Við vorum dálítið upp og niður á leiktíðinni og það er ekki skrítið þó fólk hafi ekki trú á okkur, en við erum búnir að vera að koma sterkir upp núna í síðustu leikjum," sagði Páll Kristinsson, leikmaður Grindavíkur.