Sjöfaldur NBA meistari kennir ís­lenskum krökkum að setja stóru skotin

Horry á sextán ára feril að baki í NBA deildinni frá 1992-2008 þar sem hann vann sjö meistaratitla með liðum Houston Rockets, Los Angeles Lakers og San Antonio Spurs.

Samhliða leikmönnum á borð við Hakeem Olajuwon, Kobe Bryant, Shaquille O‘Neal og Tim Duncan. Undir stjórn þjálfara á við Phil Jackson og Gregg Popovich.

Ljóst er að af nægri reynslu er að taka en hvað er Horry kominn til að kenna?

„Ég er kominn til að kenna heildstæðan körfubolta. Margir ungir krakkar sem spila þessa íþrótt í dag halda að körfubolti snúist um að setja þriggja stiga körfur. Þú getur skotið þristum, tvistum, þú verður að hitta úr vítum og sneiðskotum. Við erum að kenna þetta allt saman.

Það sem fyrsta sem krakkar gera í dag, þegar þeir koma inn í æfingasalinn, er að fara beint á þriggja stiga línuna. Ég segi þeim að fara ekki bara inn og byrja að þruma boltanum upp í loft, þú verður að hita upp og koma þér inn í leikinn. Þetta er ein af gullnu reglunum sem við kennum leikmönnum: Þú verður að byggja upp grunninn. Og þegar þú ert með það hugarfar, að vinna í litlu hlutunum til að verða góður í stóru hlutunum, þá verðurðu í fínu lagi.“

Á tíma sínum í NBA deildinni öðlaðist Horry frægð fyrir að stíga upp á stóru stundunum. Hvort sem það var hjá Rockets, Lakers eða Spurs. Alltaf setti Big Shot Rob stóru skotin ofaní.

Er það eitthvað sem hægt er að kenna, að stíga upp á stóru stundunum, eða er það meðfæddur eiginleiki?

„Ég held að það sé sitt lítið af hvoru. Ég held að þegar það er talað um þetta gen (e. the clutch gene) sé verið að tala um mann sem einstakling, hversu rólegur þú getur verið í erfiðum aðstæðum og hversu sterkur þú ert andlega. En þetta snýst líka um að vera í æfingasalnum, aftur og aftur. Það er annar hlutur sem við segjum krökkunum, þetta snýst um endurtekningar. Því meira sem þú æfir, þá verður þetta hluti ef þér, eins og gen eða erfðaefni.“

Yfirnjósnari Los Angeles Lakers, Irving Thomas, er líka á svæðinu og hefur litist vel á íslenska efniviðinn en hann segir það mikilvægasta í leiknum vera óáþreifanlegu hlutina.

„Það er enginn munur á því sem við gerum hér og þegar við leitum að leikmönnum fyrir Lakers eða önnur NBA lið. Þú getur haft alla hæfileika í heiminum en vantað suma hluti sem við köllum þetta óáþreifanlega. Ertu góður liðsfélagi? Ertu góð manneskja? Hvernig hagarðu þér utan vallar? Hvernig er fagmennskan? Allt þetta sem er ekki hægt að mæla er jafnmikilvægt og hæfileikar. Þetta er það sem ég leita að í leikmönnum.“